去寵物店後十大需要檢查既部位(二)

好多主人接番狗狗後唔檢查就轉身走人，番到屋企先發現唔滿意/整親，打比寵物店又唔認數。
主人好應該每一次接狗仔既時候都要檢查一下，不論係幾相熟既寵物店都有出錯既可能性。
所以就係度同大家講下去寵物店後十大需要檢查既部位其中一個

二.

剪指甲對寵物狗黎講係必要的！
野外生活既狗狗，因為長期要獵食所以好多時候都係通處走。
佢地走既路多數都係凹凸不平既硬地，指甲長期磨擦令到指甲唔會生長到過長既程度。
寵物狗如果唔定期剪指甲，血管就會愈黎愈長，始終有一個都要"爆甲" 到時痛苦既又係你最心愛既狗狗。

1 - 狗狗既飛指唔記得剪？

每隻狗狗既構造都有唔同，大部份既狗狗後腳天生冇飛指；前腳既飛指有可能一出生就比繁殖家剪掉。
但係有d狗仔可能四隻腳都有飛指，美容師可能一時大意冇剪到。

題外話 : 飛指對寵物狗黎講已經係零用處，冇飛指既狗仔會更容易造型。但要留意，如果狗狗後腳有飛指，要提示美容師剷毛或剪毛既時候要特別小心！

2 - 指甲流血？

如果狗狗只係被剪損小小指甲，其實只係一個小問題，只要止左血唔再流就得啦。
但係如果美容師未經你同意就一次性剪太短，咁你就要向寵物店反映啦！所以身為主人既你都要檢查係咪已經止血。

3 - 指甲流血會痛？

冇錯！指甲流血會痛的確會痛，但係有指甲太長會令狗狗走路唔舒服，同埋長期係咁既話狗狗既腳形都會改變，美容師難以造型。
如果指甲再長既話會到插肉球，狗狗行每一步都好痛！

題外話 : 腳形改變例子 : 松鼠狗 - 既腳仔係可以剪出貓貓腳，但係因為指甲太長腳指就會散開，咁就做唔出靚既貓貓腳啦。

4 - 番到屋企先再流血？

狗狗番到屋企會開心周圍亂跑，指甲又再磨損流血。呢個時候屋企又冇止血粉，反回寵物店又太遠。
如果唔係同時間十隻一齊流血既話，你可以用手指按住狗狗流血既手指3-5分鐘。狗狗同人一樣都有血小板(凝血作用)，所以按到指甲冇再出血就可以啦。

-主人必須
其實只要有養狗就應該有止血粉！
除左以上情況要用到之外，難免狗狗係屋企有意外發生。如果狗狗受傷唔能夠及時止血，後果可大可小！
點解你會買300蚊一件狗仔衫著一年，點解唔會用80蚊買夠狗仔用一世既止血粉呢？難道你屋企一塊膠布都冇？